سكوت مدنقين الروس في وهف النداء سماه
على مقفى الظلام بفزعةٍ خاب الرجا فيها
ومابين ارتحال الليل وإقبال الفجر وافاه
موكل طي مكتوبه عسى يمناه تزبيها
نصوه ولا على شرواه قول لكل من ينخاه
ولكن ندبة الفزاع أذاعت موت راعيها
سنومه يا سنومه فيك ميعاد البكا والأه
على ذاك الطريق الناس ماتاقف مآسيها
وينعون الصحيب اللي قضيت العمر أنا وياه
قضينا هالحياه أخوان نتحدى بلاويها
ندوس الشر بالرجلين يخشانا ولا نخشاه
كذا كانت صداقتنا واراد الله ينهيها
على يوم الأحد تسعة صفر في حزة المبراه
صباحن لاعساه يعود للدنيا وياتيها
بدا الناعي على بابي كسير ويسترد خطاه
دموعه تسبق هروجه ولوحاول يخفيها
وقال بحشرجة صوته خويك ياحسن ننعاه
ترا الأقدار بأمر الله على ماراد يجريها
توفى اليوم عبدالله وراح وجيت انا بأنعاه
ولا نقدر نخفي سنة الدنيا لاهاليها
صدمت وتهت ظعت وحرت صحت وقلت لاتنعاه
وهسترجت وقعدت وقمت وكفوفي ألوويها
وأنا ماغير اردد مات كيف أشلون شلي جاه
توفى ليش وين وصدمتي فالروح أقاسيها
وأقول استغفر الله لاتعيد الهرج لاتبلاه
هروج المزح هذي طالبنك لاتهذريها
مسك يدي وقال الحق صار وعلمنا قلناه
بقى للميت الدعوة إذا في الوسع تدعيها
صرخت وقلت بأعلى الصوت يامنان يالله
تحله من جنانك ياولي العرش عاليها
طلبتك ياولي الكون ياربي عظيم الجاه
طلبتك تغفر ذنوبه ويارحمن تمحيها
وهلت عبرة الفرقى ومن يقدر يسر بكاه
على من يقدر الخوه ولاينكر معانيها
تحسفت وجريت اتبع على رقعا قفور خطاه
وأصيح بصوتي المبحوح نفسي لاتعنيها
محمد صاح بأعلى بالصوت فات الفوت وآآآعزاه
وأنا مذهول مدري كيف يالخلان بااعيها
وفارس يحبس دموعه وفي صدره جحيم بكاه
ونيارن الوداع تشب في دنياه لاظيها
عسى الله يرحمه مات وترك للناس من ذكراه
فعولن خلدت ذكره ولاحين ينافيها
عزين بعد عز الله عزيز وعز من خاواه
ونفسه تتبع الشيمة ولو طالت مواطيها
الا ليت الزمن يرجع واسلي عمري بلقاه
نصيف الروح راح ونصف روحي حرت أداريها
ألا ياليتنا متنا سوى والعمر وش نبغاه
حياتن بعد عبدالله أنا ياقوم مابيها
أنا مالي حياه ادرا خطاويها بعد فرقاه
وش الدنيا وزينتها وش الغاية لنا فيها
وش الدنيا بعد خلن على النخوة يسوق خطاه
وفين عاش للطيبة وللنخوة وداعيها
أوا ويلاه ياويلي وويل الحال ياويلاه
ولاويل الجريح اللي حياته ماهنا فيها
وعزاه وشقا حظي بعال الصوت واعزاه
حسايف يازمانن حطم الخوه وبانيها
والا يالفاجعه من برهة الله غدوتن تنعاه
عسا روحه بجنات النعيم تطوف عاليها
فمان الله يالوافي وداع الله بمان الله
وداع اللي يدبر دورة الدنيا ويجريها
رحلت وعقبك ازداد الشقا والعمر يامقساه
رحلت وصرت وحدي للحياة القى بلاويها
عضيدي غاب من دنياي اذاع الفجر لي فرقاه
صباحن مر ينهش روحي نهاش ويفريها
يصيحون البشر أنساه لكني عجزت أنساه
يقولون العرب عزاه لك وآقول وشفيها
حياتي عشتها يمه هنيت أيام في لقياه
هو اللي لاحكوا عن صادق الخوه ووافيها
رحل وأقفى من الدنيا وماباقي سوا ذكراه
على كف القدر ساقت به الرحلة خطاويها
أبصبر ياعسى في جنة الخلد التقي وياه
على كوثر رسول الله بدارن عز بانيها
جريح القلب جرحن آه ياويلي وياعزاه
جروح القلب يالخلان ماحي يداويها
وجرح فراق عبدالله على روحي فيما أقساه
همومي بعد عبدالله قلولي من يسليها
ورقعاء كلها للحين تبكي دم من فرقاه
وكل المع تنوح ولابقى شين يواسيها
خذيت الصمت وأفنيت العمر هايم مع ذكراه
أداري نفسي بصمتي وفي ذكراه أسليها
بكيته والزمن جافي شكيت ولاقويت أنساه
يقطعني مرور الوقت مدري كيف تاليها
وياعيني فهلي صادق دموعك على فرقاه
حسافه يامقابيل السنين اشلون بقضيها
شكيت البعد من بعده وجرح البعد زاد الآه
ولا شفت القلوب الى صخور الله يجازيها
وكيف انسا صحيب الروح يالخلان كيف انساه
أشب النار لأجل أنساه وأنسى واحترق فيها
بأقضي باقي أيامي الولي في حسن ذاكره
وله صورة أناظرها وأسلي ظيقبتي فيها
ألا ياليتنا متنا سوى والعمر وش نبغاه
حياتن بعد عبدالله وش الحاجه لنا فيها[/color][/color]
الخميس مارس 05, 2015 3:21 am من طرف 
موضوع: مرثيه عبدالله يحيى البناوى للشاعر حسن تميم الحجري 
